在小暑节气里，农民会得拿今年新收下来的小麦，去轧成面粉，做馄饨、投生面、摊面饼佬啥吃，不过做个头一样点心是塌饼，迪个是上海本地人的一个传统习俗。
拿小麦晒干扬净之后，放拉磨子里牵，磨出个面粉用绷筛筛，筛出麸皮粗头再磨，最后拿麸皮浸湿，放拉面盆，或者脚桶里，让伊自然发酵。等到能捏出丝丝来了，就拿起一把捏，捏发捏发，丝越来越多，迪个就是“面筋”，然后放在水里汏，拿麸皮，浆头全汏垃水里。迪个叫“汏面筋”。面筋汏好了，就把水里的麸皮小心漂清爽，留在水里的粉，就是黄浆，由于时令气温高，黄浆容易发酵，有点酸味。黄浆滗脱水，放日头里晒干，就是“菱粉”。不过，妈妈婶婶伲姆妈佬啥，全用黄浆做黄浆塌饼吃。姆妈让我去叫大大姆妈，大姨姆妈，娘娘佬啥，一淘到伲海头来做塌饼吃。
姆妈话：做黄浆塌饼先要把黄浆连水一淘烧滚，不停个捣，勿好搭底，黄浆烧泞烧熟冷清爽，倒进团箕里的面粉里向溲，用双手搦，搦到不溚手后，扚成一个一个圆子能大小，搓圆，捏成一只小碗样，把馅儿放在“小碗”里，慢慢把口收小，最后收成一只奶奶头，放在团箕里揿扁，迪个就是塌饼。
沪谚说：“六月大热最难熬，止渴吃点大麦茶，黄浆塌饼吃到珍珠米，黄金瓜吃起吃到大西瓜”“黄浆塌饼吃坏肚，小麦根上起个祸”。黄浆塌饼不再有，也不会在起什么祸。埃个辰光，做黄浆塌饼，主要是节约粮食，肉麻那丁点儿残留在麸皮里个淀粉。做塌饼的馅头除桂花豆沙、糖咸菜，还有放了长远，蜡蜡黄的咸猪油、咸鸡油，加一眼葱花。塌饼做好了，就开始放勒拉镬里熯。镬子里加眼油，烧到五成热辰光，拿塌饼一个一个摊好，到镬子里发出滋哩滋哩的声音，飘出了香气，就换成小火，一边翻，让塌饼两面受热均匀，直到每个塌饼两面“有字”——焦黄以后，盖上锅盖再烧，然后舀半碗冷水浇在塌饼锅里，快速盖上，让塌饼连馅头彻底成熟。停火后再焖一会。
塌饼熯好了，一揭开镬盖，浓郁的香气马上弥漫满家屋，香飘满宅基。有一趟，姆妈刚把塌饼盛起来，我就来生勿及，拿了一个就咬，谁知道这是个糖塌饼，融化的糖汁烫得我歪牙咧嘴的。娘骂我像是“饿煞（死）鬼投胎”。
现在，面粉全是到粮店，或者超市里去买的，告佬也没了“黄浆塌饼”。阿奶话，没了黄浆做塌饼，溲面现在换成用隔夜烧好，盛在蓝边大碗里冷清爽的大米粥。塌饼还是一样做。现在，大家日脚过来邪气好，家家不缺啥钞票，馅头个花样多起来了，啥个白糖枣泥、糖桂花、玫瑰豆沙、黑羊酥、葱花精肉、猪油夹沙，要啥有啥，不过最欢迎的是咸菜塌饼，甜甜酸酸咸气气的，既好吃又不会得发胖，一歇歇全拨年轻人拣光了。
如今，已经不可能吃阿奶、老妈妈、娘等老辈做的塌饼了。但是，到立夏以后小麦收成当势，或者逢年过节，还会做塌饼吃。但是那种塌饼香，塌饼味道，永远是我们的记忆，抹不去，忘不了。