上海浦东乡下头，每到农历八月中秋节，家家侪要吃月饼（塌饼）、煠毛豆节、糖烧芋艿佬啥，黄昏头还要坐垃场浪向，一面看的溜滚圆个月亮，一面吃甜芦粟。讲起迪个吃甜芦粟习俗，还脱乾隆皇帝搭界呢。
相传勒拉大清乾隆年里，乾隆皇帝先后有六七趟，到江南一带来微行察访。有年立秋过后，乾隆皇帝带着个小太监，又到江南来，迪趟是想看看农民种个水稻长势哪能。当时节气已经交过立秋，不过“秋老虎”还热得来勿得了，日中心的更是热来要死（xi）。皇帝老子趵垃田埂上，又勿好撑阳伞，伊热得来满头大汗，口苦舌焦，附近又没人家可以讨水吃。虽然田野里河浜多，水也邪清爽，农民口干了就去掬来喝，但是皇帝老子是万万喝不得个呀。
陪乾隆皇帝出来个是出身垃江南的小太监。伊看见皇上热来汗潽溻潽个，心里邪气着急。突然，伊发现不远个田野里向有甜芦粟，就想起童年辰光的夏天式吃芦粟的事来。连忙三步并作两步，跑过去攀来了几根，捧到皇帝跟前。皇帝是北方人，呒没看见过芦粟，覅讲会得吃哉。小太监就拿芦粟拗成一节一节，撕脱芦粟皮，吃个样子拨皇上看。皇帝接过芦粟一吃，甜咪咪，凉丝丝个，顿时眼目清亮，龙颜大悦，连声夸奖小太监保驾有功。
来到一片水稻田，虽然已经烤田（停水）了，但田埂上灌溉过水的缺口有交关。皇帝只顾眼看庄稼，一不小心一脚踏空垃缺口里，差点跌倒，一扭身，损仔腰，一时上头痛得来寸步难行。小太监急忙扶皇上到田毛角里个树底下，坐垃田岸上，又去攀来几根又长又粗的甜芦粟，让皇上一边吃芦粟一边休息。皇上一连吃了三根，腰痛顿时减轻了；又吃了三根，竟然能直起腰来了；再吃三根，肚皮发胀，一股气流升起直冲出嘴巴。一息息，皇上说腰勿痛了，可以趵了。小太监勿放心，又去攀了一根粗芦粟，拗脱老根根，拗脱梢梢头，当根撑压棒（拐杖），让皇帝撑仔趵路。迪个一日天，正好是农历八月半——中秋节。
第二年中秋节前，皇帝想起旧年头下江南伤腰吃甜芦粟个事体来，就差人去攀。啥人晓得攀回来“芦粟”皮撕不掉，一口咬上去软绵绵的，汁水也呒没。原来，差去攀芦粟的人，分勿请芦粟还是高粱。于是仍旧叫旧年头那个太监去江南弄。中秋之夜，皇帝吃着芦粟，一边给文武百官讲那个“甜芦粟救驾”的故事。
后首来，中秋节夜头来吃甜芦粟的事体，勒拉江南农村里传开了。原本来农家只要芦粟成熟了就开始吃，从那后还要种慢芦粟，好到中秋节夜里吃，叫吃“撑腰芦粟”，讲可以防止“损腰”。如果勒拉中秋节里拿三节一连，三节一连的芦粟，送拨来登拉市区里个亲朋好友吃，伊拉侪会开心来不得了。
评论列表（5条）
写的好，
满篇地方语，别有点新意。也让人明白了那个地方吃甜到梢的原由，和节日的由来。大赞赞赞赞赞
现在明白了上海卖甜芦粟三节一连的含义
感谢邳州文化网推荐有上海本地闲话的民间文学作品
[花
拜读佳作，点赞学习！